سبيطارنا ونمنعوه، قصة حقيقية عن صعوبات العمل في المستشفى العمومي وتدميره الممنهج

[ هذه قصة اخبارية حقيقية، من النوع الذي يوصي به أساتذة الصحافة وعلوم الاخبار. فيها كثير من الصدق والشفافية، فيها حكاية عن الوضعية التي عاشها كاتبها ولكن فيها مواقف واعلان مبادئ ودحض لاتهامات وتصحيح لاخطاء. كاتبها ليس الا الاخ سامي الطاهري الامين العام المساعد للاتحاد، نشرها كتدوينة على صفحته الخاصة. استحسنها الكثيرون لانها نفذت الى قلوبهم قبل عقولهم. وحتى يطلع عليها آخرون، رأينا، بعد موافقة صاحبها، نشرها على الشعب نيوز]

يوم 16جويلية دخلت بنتي لمستشفى المنجي سليم لعملية استعجالية..الحق لقيت الترحاب رغم أنو كانت نهاية الأسبوع وموش بالمعارف برشة..

ما تفاجأتشت بالظروف الصعبة اللي يخدموا فيها كل الأعوان: أطباء وفرملية وعملة وأعوان حراسة..الكل يعانوا وخاصة جماعة الاستعجالي..

من غدوة

مشيت نخلص لقيت وقتها الأمور نهار الأحد وصعب التسوية.. رجعت اليوم 28 سويت الوضعية خارج إطار الكنام لبنتي الطالبة (موضوع مظلمة نرجعلو لاحقا) وخلصت..

المستشفى يفغّم..

العاملين يعانوا..مكتب الفوترة فيه 3 أعوان وهو ما يرفعش واحد.. الملفات مكدسة..

المرضى على كل الأنواع..سبيطار تقول يستقبل في مرضى تونس الكل..

رغم بعض التعطيلات وحسيتها فوق الطاقة، انتظرت..شدّيت الصف..

الأعوان ما قصروش..ما يعرفونيش وما نعرفهمش لكنهم حرصوا على أموال المؤسسة..

نحب نأكد اني قادر نفسّر ضيق انفسهم فلو كنتُ مكانهم لانفجرتُ، إنهم يحملون الجبال الرواسي: نقص الاطار وضعف التجهيزات ونقص الوسائل والازدحام مع الفوضى..

حضرت على أكثر من عركة وعلى الاستنجاد بالأمن..وشفت العجب..واللي ماشافش ما يصدّقش..

موش أول مرة..أما المرة هذي الطوب..(TOP)

ماجبتش جديد على معاناة المستشفى العمومي..قبلها بأيام في القصاب كل العاملين صرخوا في وجهي: ما ثماش فاصمة، ماثماش خيط، ماثماش بروتاز، ماثماش أدنى وسائل العلاج، رانا نأجّلو في العمليات على خاطر ما عندنا شي، المريض يشري حتى القفازات... هذا مستشفى جامعي فما بالك بالجهوي والمحلي والمستوصفات..

تلقى روحك متأكد اللي عملية التدمير ممنهجة..مدروسة..على خاطر كي تشوف فاتورة المستشفى العمومي وفاتورة المصحات الخاصة تكفر..تقول البلاد مقسمة بين اللي عندو واللي ما عندوش..

ما نيش باش نشكر أطباء وأعوان منجي سليم وكل المستشفيات العمومية على خاطر ما يزيدهم شكري حتى شي هذا إذا ما يقولوليش ماعندنا ما نعملوا به شكرك.. اما حقا إنهم/ن مجاهدين ومجاهدات..وكل واحد عندو تهجّم غير يحط روحو مكانهم ساعة زمن..

تنويه: مواطن تعرّف عليّ في الصف فاجأني وقالي: هاك معانا وانتم جماعة الاتحاد عندكم ثروات الدنيا..شبيهم عبّولكم كروشكم بالهواء..حشمت ما نجمتش نوضحلو..كملت شديت الصف وخلصت..

الرابط اسفله هو عن تحقيق قمنا به منذ مدة على معاناة جماعة منجي سليم واللي وقفت عليه المرة هذي مباشرة،

#سبيطارنا_و_نمنعوه Sauvons_l'hôpital_public# - YouTube

كل التقدير للاطار الصحي أينما كنتم/ن

#سبيطارنا_و_نمنعوه