الشعب نيوز / أبو خليل – نشر المحامي الأستاذ أنيس الزين يوم أمس الخميس 12 نوفمبر 2026 تدوينة حول وضعية الصحة العمومية بقليبية اثر وفاة شاب تعرض إلى حادث على دراجته النارية وبسبب غياب التجهيزات الطبية في المستشفى المحلي بقليبية توفي وهي ليست المرة الأولى التي يعجز فيها العاملون بهذا المستشفى في انقاذ مريض او شخص بسبب غياب طب الاختصاص و التجهيزات الطبية فقد شهدت المدينة كوارث مشابهة.
ويقول أنيس الزين في تدوينته ما يلي : ” رد بالك تمرض في قليبية… ورد بالك تعمل حادث! رد بالك تطيح، رد بالك تزلق، ورد بالك حتى تتوجّع في بلاصة ما تلقاش فيها شكون يداويك.
في قليبية، في 2026، المرض ولى مخاطرة، والحادث ينجم يكون حكم بالإعدام قبل ما توصل حتى للسبيتار.
عمري تو قريب للـ55 سنة، ومن نهار وعيت على الدنيا وأنا نسمع بحوادث تصير في قليبية، والمصابين يلمّوهم ويهزّوهم لمنزل تميم، وإذا الحالة أخطر يمشيو بيهم لنابل، وإذا استعصى الأمر تونس. وكأنّ قليبية ما عندهاش الحق في مستشفى ينجم يحمي حياة العباد.
سبيطار موجود بالاسم، أما التجهيزات ناقصة، والإمكانيات محدودة، والكفاءات الطبية اللي يلزم تكون موجودة موش ديما متوفرة. والمواطن اللي يجيه مرض مفاجئ، ولا يتعرّض لحادث، يلقى روحو في سباق مع الوقت، والوقت في الحالات هاذي ينجم يكون هو الفرق بين الحياة والموت.
البارح مات عمر الجربي، بعد حادث بالموتور. حسب ما يتم تداوله، قعد 11 ساعة ينزف قبل ما يفارق الحياة.
11 ساعة! ما نتصورش فما وجيعة أكبر من إنسان يتعرّض لحادث، وعوض ما تكون الأولوية إنقاذ حياتو، يلقى روحو يستنّى في الوقت، وفي الإمكانيات، وفي وسيلة نقل توصّلو لمستشفى ينجم يتكفّل بيه.
ما نحبّش نسبق التحقيق، وما نحبّش نحكم على مسؤولية طبية ولا إدارية قبل ما تتكشف الحقيقة. أما من حقنا نسألوا: علاش مواطن من قليبية يلزمو يقطع عشرات الكيلومترات باش يلقى العلاج؟ وعلاش مدينة بحجم قليبية، بعدد سكانها وبموقعها وبحركة العباد فيها، ما عندهاش مؤسسة استشفائية مجهّزة للتدخل في الحالات الاستعجالية؟
عمر الجربي موش مجرّد اسم في خبر وفاة. هو إنسان، وعندو عايلة، وعندو ناس تستنّاه يرجع للدار.
والحكاية موش حكاية عمر وحدو. اليوم هو، وغدوة شكون؟
يا جماعة، الحق في الصحة موش امتياز، والحق في الحياة موش مطلب ثانوي.
قليبية ما تستحقّش سبيطار بالاسم، تستحقّ مستشفى فيه التجهيزات، فيه الأطباء، فيه الإنعاش، وفيه الاستعجالي اللي ينجم ينقذ حياة إنسان.
موش معقول في 2026 المواطن في قليبية يلزمو يحسب ألف حساب قبل ما يمرض، ولا قبل ما يخرج بدراجتو، ولا قبل ما يطيح في الشارع.
رد بالك تمرض في قليبية… هاذي موش نكتة، هاذي صرخة مدينة كاملة .”
فهل تلتفت السلطة ووزارة الصحة للألف صرخة بل صرخات و دعوات تم توجيهها في كل العهود ومنذ غقود ولكن لم يتغير أي شيء.
