اعتداء الباطن : جريمة في حق النساء وفي حق العمل النقابي وفي حق الدولة
تعليقا على حادثة اعتداء مسؤول ايطالي في مصنع يقع في الباطن بالقيروان على مجموعة من العاملات ، كتبت الصديقة منيرة بلغوثي تدوينة ضمنتها صرخة مدوية في وجه المظلمة التي سلطت على العاملات وفي وجه التشريعات التي لا تلقى طريقها الى التنفيذ. كتبت التدوينة باللهجة التونسية الدارجة وبالنظر الى ما لمسناه فيها من صدق نقلناها بعد استشارة صاحبتها كما كتبتها.
لي صار اليوم في معمل الخياطة بالباطن فضيحة دولة وليس فقط عقاب تأديبي من المستثمر الاجنبي "الباندي" أو جريمة أخرى على النساء العاملات وعلى حق العمل النقابي المدستر والمحمي بالمواثيق الدولية.. لي صار أكثر من اجرام مؤجر مورس على الكاتبة العامة للنقابة الأساسية بالمصنع، ولّي حبّت تعطي اعلام لزميلاتها بخصوص مخرجات جلسة التفاوض بحضور الاتحاد الجهوي للشغل لي صارت البارح.
جريمة اليوم هي استخفاف بقوانين الدولة الرائدة في حقوق النساء، هي اعتداء على سيادة دولة تعطي للمستثمر امتيازات جبائية باش تشجعو على الاستثمار، تعطيه الأراضي وتوفرلو يد عاملة بخسة دون وضع الشروط اللازمة في حفظ كرامة العمال والعاملات.
اليوم المؤجر لي ديما معارض للعمل النقابي ماعادش يعاقب بالنقلة و بالطرد التعسفي.. اليوم وانسجاما مع العنف المعمم وفي استخفاف بالدولة وبقوانينها، يضرب بآلة حادة ما يفرزش الراس من الوجه من البطن... منهن مرا حامل بتوأم مازالت مقيمة بالمستشفى
اليوم المؤجر لي من المفروض تجبرو التشريعات على الموازاة بين مصلحته الاقتصادية والاجتماعية وانخراطه في الوقاية من العنف..ما يكفيشو الاستغلال المفرط ولا التمييز القائم على النوع ولا غياب كل الحقوق الاقتصادية والاجتماعية بل فوق من هذا امتهان لكرامة العاملات واجسادهن بأشنع طريقة ...
اليوم بقدر ما نحيي شجاعة سلوى البلحودي الكاتبة العامة للنقابة الاساسية في مصنع الخياطة بالباطن وزميلاتها وصمودهن امام العنف المركب ضدا النقابيات في للقطاع الخاص لي يخليهم ديما في الهامش: عنف جسدي، اقتصادي، معنوي ... بالإضافة الى ما يرشح من عقبات كلنا نعرفوها، مثل الكلفة العائلية ورفض الشريك والعائلة والنظرة النمطية للعمل النقابي على انه فضاء ذكوري..
بقدر ما ننجمش نوصف احساسهن بالمرارة والاذلال والاهانة.... مكافئتهن على العمل في اتعس الظروف ، في وقت تخدم فيه اكثر من 500 عااملة حتى في فترة الحجر الصحي الشامل: "اخدمي وفمّك ساكت"....العاملات الاجيرات المناضلات النقابيات لي ما طالبوش في مكان العمل بمحاضن ورياض أطفال ووسائل نقل امنة وأنظمة تامين كافية ..ما طلبوش اكثر من حفظ كرامتهم .
سماسرة اليد العاملة في تونس
سماسرة الكرامة الانسانية
شنوا معناها يستثمر ويكدس الأرباح ويدوس على كرامة العاملات؟؟
سماسرة اليد العاملة
سماسرة الكرامة التونسية
باسطا يزينا سياسة التخويف : "هاو مش يهرب المستثمر"...
راجعوا تشريعاتكم
وفعلوا قوانينكم
اضمنوا حقوق العاملات، اعطوهم اجر يستجيب للمواصفات الدولية، وفرولهم مناخ جيد ..
سماسرة اليد العاملة
سماسرة الكرامة الانسانية
العولمة والسوق المفتوح لازم توازيها تشريعات تحفظ كرامة العاملات
هي احتقار للدولة اعتداء على سيادتها...
منيرة بلغوثي
