خلينا نتفاهمو قبل كل شيء أنا موش بنكاجي كيما يقولوا برش ناس، مانيش banquier كيما يكتبوا بعض المعلقين. انا فقط خدام عند بنكاجي.
نخلص 2300 في الشهر
ملّي ندخل للبيرو ما نهزّش رأسي. العمليات في جُرّة بعضها. جهد كبير في التركيز والتثبيت في كل شيء. حتى كيف يطيح الريتم نستغل الفرصة باش نحسب، جمع وطرح، وانا هكاكا تجيني عملية جديدة، نخدمها، ومن بعد نرجع للجمع والطرح.
نعاودهم من الأول، نلقى غلطة، نحبس، نعاود نحسب، يدخل حريف طالب خدمة ما نسمعوش، لانّي مصدوم من الغلطة، يتنرفز الحريف، يمشي يشكي، وانا حال فمي دايخ في الغلطة ، يجي عرفي، متربّي الحقيقة، يقول لي شبيك؟
بالطبيعة نقوله ما بي شيء. نتلفّت للحريف نقوله ياخي جيتني وما خدمت لكش.
يشريها لي. نسكت على خاطر عرفي قدامي وانا quelque part غالط ونخدملو وانا نرعش لأني وليت تحت ضغط 3 حاجات: الحريف وعرفي، خوفي من غلطة اخرى نعملها، وثالثا الغلطة الاولى.
سترني ربّي ومشى الحريف راضي وعرفي يضحك. اما أنا لا . اضطرّيت نخرج البرة نشمّ طرف هواء لكن فسّدتو ب3 سواقر تكيّفتهم ضربة واحدة، شعّلتهم واحد من الاخر.
كي رجعت نلقى عرفي حط لي ع البيرو 3 دوسيات ما حبيتش نمسّهم قبل ما نفضّ مشكلة الغلطة لولى.
هابط طالع والغلطة هي هي زيد اهبط اطلع مرة اثنين في الثالثة لقيتها.عرفي ما خلانيش نفرح.
وين الدوسيهات الي خليتهم لك؟ يا سي؟
حاضر حاضر
هاتهم. موش حاضرين؟
قلت لك حاضر يعني ها تو نخدمهم
ربع ساعه فيدك.
اش نحكيلكم ثلاث سوايع وما كمّلتش اما جاب ربّي عرفي ما رجعليش على خاطر عرفو عيّطلو وخرج هو وإياه.
ماضي 3 ودرجين جا ومن الباب قال لي
وينك سي الشباب، المعلّم مرجني على هاك الدوسيهات
لحظات فقط
شنو لتو ماحضروا؟
حاضرين حاضرين، شويه verif واكاهو
سيب جاي كان ثم غلطة تعرف حسابك.
أوف
خرجت نعمل سيقارو ياخي دوخني تفكرت الي أنا ماكليت شيء من الصباح
وانا نفكر نواصل هكاكا هاي قريب الخمسة تو نروّح وناكل في الدار والا نمشي نشري كسكروت نشد بيه روحي.
وانا بين ايه ولا، يجيني عرفي ومعاه عرفو وطول يقولي:
كنت نحكي عليك لسي فلان قتلو ما يمنّعنا كان هو.
ولا طاح لا دزّوه يلطخ قدامي بوات درشيف ويقلي:
هذا الملف الكامل متع حريفنا هذاك الي عندو وعندو، نحبّو تعاونوه. عندو مشكلة مانيش عارف مع شكون، ثم شوية تخلبيص في أوراقه، معملين عليك باش تنظمهم وتشوف ليستوريك كان ثم حاجة هكا وإلا هكا ….
مين غير ما نشعر يا جماعة، شدتني سخانة والدم طلع لي والسكر طاح لي ما هو في بالكم ما فطرتش وبقد ما عطاني ربي من جهد نطرشق عليه بوحدة لا سمعتها البانكا الكل ونطيح ما في عيني بلّة.
فقت نلقى روحي في بيرو عرف عرفي وكاتبتو تمروح عليّ:
فقت سي الشباب، في بالنا بيك صيد بوقلادة، ياخي على مراد الله، طلعت تدوخ، ودوختنا في جرتك.
أنا فاش نعمل هنا
ياخي نسيت روحك
آخر عهدي بروحي في الهول قدام بيرويا نخمّم نفطر والا لا وجاني سي فلان وعرفو
انت الّي جيتهم
اش ما جيبني ليهم؟
شنوا توا نسيت روحك وانت تتطاول
أنا نتطاول؟
ايه سيدي خويا، زيدوني في الشهرية والا…
أنا؟
ايه انت وبالأمارة طحت تصيح لين حبالك الصوتية قريب تتقطع
أنا ؟
ايه انت، فيسع نسيت
يا بنتي أنا آخر…
مانيش بنتك ومانيش أختك زادة
نقصد يا مدام
مانيش مدام
سامحني انا اخر عهدي كنت في الهول وجاني سي فلان وعرفو دخلوا معايا للبيرو وحطوا قدامي بوات درشيف
يزي من الهبال متاعك، انت ريتهم في الهول طالعين لهنا، خلطت عليهم وانت هائج كالصيد: خدمة ياسر يزّيني فدّيت زيدوني في الشهرية والا مت عادش خادم.
إنا؟
انت ولو كان موش شفعت فيك أنا ربي يعلم راك وين تو
شفعت فيّ؟ ياخي اش عملت أنا ؟
تتهدّد على العرف وتحبّ تدّخل صبعك في عينو
أنا؟
شدّيتكِ وما خلّيتكش تزيد تقدّم اكثر
علاه انا كنت قدّام بيروي وهوما جاوني
احكيها لحد اخر أما أنا حاضرة
يظهر أنا هبلت
اي نعم. شنو الواحد يطلب الزيادة هكاكا
رغم اني ما طلبتوش، شنوّ المشكل؟ والنقابة قائمة باللازم
برّا قال لو نقابة
أي نعم نقابة. أما الموضوع ما كانش زيادة راهو هو جابلى بوات وقال متع فلان قتلو لا
اش كون يقل لو لا هذاك
أنا قتلو؟
يزي من الأفلام متاعك وبر روّح توّه وما تجي كان نهار الاثنين
علاه؟
خلّي الجماعة ينساو الحكاية
حكاية شنوا ؟
ماك اعتديت عليهم
أنا؟
امالا انا ؟
يا بنتي جابوا لي بوات درشيف
لا بوات ولا شيء. ماعا دش تعاودها الحكاية
عجب انت معاهم زادة
كان جيت معاهم ما نشفعش فيك
فاش شفعت؟
ما يطردوكش. قوم روّح خلّيني نخلط على لقمة. ملا هموم هابطة علي
يطردوني؟
ايه وكل شيء جاهز
عجب؟
قوم قوم روح وما تطولش علي الهدرة. سامحني ماش نسكر البيرو.
———-
- قصة وحوار من وحي الخيال واذا شابها الواقع فان ذلك من محض الصدفة.